الاثنين، 2 أغسطس 2010

ليه؟



ليه لما بكون محتاجة اتكلم مع حد بجد مبلاقيش و اما بكون مش طايقة الناس كلها ألقى كل الناس بتكلمني؟
ليه الشتا بيخلص بسرعة قبل ما اخلص كل مشاريعي فيه و الصيف بيطول و معاه بتتأجل كل أحلامي للشتا الجاي؟
ليه انا بتعلق دايما بحاجات و بناس عارفة اني هفارقهم و مبتعلقش ابدا بناس قريبين مني و عارفة اني مش هضطر افارقهم في يوم؟
ليه اصحابي بيوحشوني قوي مع ان قليل لما حد يكلمني و يقولي اني وحشته؟
ليه في عز ما انا فرحانة بنقبض بسرعة و تضيع مني الفرحة في ثواني مع ان الحزن عمره ما ضاع في ثواني؟
ليه كل اللي يعرفني مشافش مني غير الضحكة و الابتسامة اللي مبتفارقنيش ؟
ليه الحزن جوايا متداري مبيوجعش غيري ؟
ليه بحب ناس مبتحبنيش و محبش ناس بتحبني؟
ليه أنا لحد دلوقتي مش قادرة افهم الناس صح ؟
ليه كل حاجة بستناها تيجي في وقت مش مناسب؟
ليه انا حققت جزء من احلامي و اقتنعت اني اقدر احقق الجزء الباقي لما كان ممكن محققش حاجة خالص و اكون واثقة اني مش هقدر؟
ليه النور بيقطع لما بكون قاعدة لوحدي ؟
ليه بنلزق كل حاجة للنصيب ؟
ليه أنا مبقاش حد تاني و خلاص ؟