الخميس، 5 يوليو 2012

أبعد مكان !


أبعد مكان عندي هو المكان اللي نفسي افضل فيه باقي حياتي ،أشرب هوت تشوكليت و آكل بيتزا أو مكرونة بالصوص الأبيض .
هو المكان اللي هيضمني لما أفرغ حزني من العالم و غضبي من الناس كلهم ،
هو المكان اللي هقرا فيه كل الكتب اللي بحبها و لما تخلص هقراها تاني من غير ملل ،و هقدر اسمع فيه المزيكا اللي بحبها على أعلى صوت ، و لما أزهق هكلم نفسي بصوت عالي من غير ما حد يقولي "إنتي بتكلميني؟" .
هو المكان اللي هيحضنني و يطبطب عليا لما أحتاج لطبطبة خفيفة تنفض عني كل الغبار و الحزن و الهم .
أبعد مكان هو أوضتي الصغيرة بكل ترابها و هدومها المرمية ،و كتبها الكتيرة و لوحة أمل فوق السرير و صورة فؤش الفنان في وشي أول ما بصحى ، و ماكياجها المبعتر و بارفاناتها المتلخبطة و لريحتها الجميلة .
ريحة الأمان و الدفا .
ريحة العرق جوة أحضانها .