الخميس، 6 يونيو 2013

شجن





كنت فاكر ان حزنك هينعكس على مرايات المحلات المنورة و بتلمع ؟
جسمك أتقل من ست بيت مصرية أصيلة- مش بيكفيها كرسي واحد أبداً - بتشد جسمك عشان تعدي الشارع بالعافية ،جسمك مطاوعكش و معرفش يطلع رصيف الجزيرة اللي في النص ووقع ،لما قمت من الوقعة كل اللي همك وقتها هو فردة جذمتك الرصاصي  اللي بتطولك 5 سنتي بحالهم .و اللي مرمية في عرض شارع البحر و ساكنة .
بتدحرج الشنطة في ايدك جامد ،متخيل ان الهدية اللي جواها القابلة للكسر هتتفرفت و هطلعها من العلبة و هي تراب ،
الهدية كان أمتن منك و مجالهاش ولا حتى شرخ صغير .
...
أنا انا الواد الجن اللي لا يهدى و لا يكن
طالع أزن نازل أزن
....

التراك التسعيناتي اللي في ودانك بيفكرك بطفولتك ،
أول مرة شفت فيها علامة الكاس القابل للكسر كانت على كراتين بضاعة باباك التاجر اللي اتعامل معاك على انك أصلب من أي كاس ،عشان كدة مشافش روحك و هي مشروخة اكتر من مرة .
....

حسن  الأسمر .
تحية ليك و لأغانيك كلها ،أسفة اني كنت فاكراك عجلاتي اول ما بدأت تغني ،و فضلت مطلعة عليك اللقب لحد ما مُت .
                                                                             
                                                                                               تقبل اعتذاري .

...
رحنا هناك و قالولنا هنا
هنا هو هنا هنا هنا هو
و جينا هنا و قالولنا هناك

استقر شوية يا عم حكيم ،يا هنا يا هناك ،
مينفعش تبقى موجود في مكانين مهما حصل .
انت مش زيي ،انا ببقى موجودة في الحياة و برة الحياة ،عادي بتحصل .
...
كنت صغيرة وقتها لما قررت ميس فردوس بتاعة التربية الموسيقية اننا نغني لو صوتنا حلو ،اميرة طلعت و غنت مبيسألش عليا أبداً ،و بنت تانية غنت هان الود عليه .
وقتها كنت فاكرة ان صوتي حلو فوقفت في وسط الفصل و غنيت لحكيم ،
طبعا الفصل كله اتملى ضحك ،لكن دة موقفنيش ساعتها خالص و فضلت اغني لحد ما ركزت شوية و اكتشفت سوء الموقف اللي انا فيه ،ضحكت و قلتلهم هي الغنوة اللي وحشة و دخلت قعدت مكاني .

...

بتتعب روحك و دماغك و بتحاول تفتكر هو كانت إيه وسايلك العظيمة للنجاة من الاكتئاب ،
أولا : كنت بتقعد تاكل كتير كل الأكل تقريبا مفيش حاجة بتفلت منك "احم يشطب هذا النوع من العلاج لأن الأكل ممنوع " .
ثانياً : كنت بتقرا كتاب حلو يشدك و تنسى بيه نفسك ."دة اسمه ضعف ،متهربش من اكتئابك ".
ثالثاً : كنت بتعيط " بتعتبر العياط ضعف ،دموعك خالية عليك كدة ؟ إشرب بقى اكتئابك كامل و مترميش و لا نقطة ".
رابعاُ:  كنت بتكتب و تسيب نفسك للحالة . "أمال أنا بعمل ايه دلوقتي ؟ ،هنهزر ؟".

...

البنت الصغيرة جنبك في المشروع سمرا و بديل حصان طويل ،شدتها منه و لاعبتها ببالونتها الحمرا الكبيرة ،
قعدت تلمسك بالبالونة يمكن تجيبلك بهجة في لمستها ،و هي بتكلم أختها في تليفون مامتها قالتلها انها جابت بالونة حمرا و مقدرتش تجيبلها عشان هي معهاش فلوس ،قعدت تعتذر لاختها الصغيرة لحد ما مامتها شدت التليفون منها .
البنت اتحولت لجنيه صغيرة بعصاية سحرية و جيبة قصيرة ،
شبه الجنيات الصغيرة اللي أمك حطتهم فوق سريرك عشان تطرد الحزن من حوالين سريرك و متسمحلوش يقرب منك ،ووقت ما تحس انه فيه حزن بيقرب ،خليك واثق ان الجنية هتطرده منك بلمسة من عصايتها الصغيرة .

...
مرايات المحلات رغم انها عكست تعبك من الوقعة و بنطلونك الأسود المترب ،معكستش العضعضة اللي في قلبك ،و ضافت لعينك لمعة كذابة مش بتاعتك .
مرايات المحلات كذابة زي الناس اللي جواها ،
زي البنت اللي في المحل اللي كانت مصرة ان مقاسك يادوب 3 عشان تبيعلك اللي عندها و خلاص ،
البنت اللي في المحل كان قدامها قياسك رقم 6 بس من كسلها و لهفتها عالبيع مشافتش أبعد من 3 .

...

عايز أرجع يا شمسي
ألقى ماضيا منسي
أرجع أكون نفسي
أكون إنسان .

...