همسات و خواطر: السبعات

الأربعاء، 17 سبتمبر 2008

السبعات

"السبعات و احلامي المستحيلة"

اولا:سبع حاجات نفسي اعملها

اتشجع و اعرض كتاباتي في اي موقع
نفسي اشتري عربية BMW
نفسي اقرا اكبر قدر من الكيب
نفسي الاقي الكتب اللي بدور عليها
نفسي ابدا كورس ICDL
نفسي احب بجد و لو سحلية
نفسي ادي دروس خصوصية و اعدي بقى

ثانيا: سبع حاجات مش بعرف اعملها

اني ارجع ارسم تاني زي زمان
اني ابطل هزار مع الناس اللي معرفهاش
اني لما ازعل من حد اقوله اني زعلانة منه
اني اقنع اي حد بوجهة نظري في اي موضوع
اني اعبر عن اللي جوايا بطريقة كويسة
اني لما ابقى مش طايقة حد مش بعرف اسلم عليه حتى
اني اعترف بغلطي بسهولة

ثالثا:سبع حاجات بقولهم طول الوقت

ياسلام ..تعبيرا عن عدم تصديقي لكلام احد
و الله..برضه عن عدم تصديقي لكلام احد
ايه النظام..ايه الاخبار يعني
ياراجل..لما مش بصدق حد
ايه القمر ده..لما اشوف واحدة مزة
يا رب ارحمني بقى..لما اشوف وش واحد خانقني
خدني و ريحني يا رب...لما اتخنق من الدنيا بحالها

هناك تعليق واحد:

الليل القوطي يقول...: بالنسبة للسبع حاجات اللي نفسك فيهم
أول حاجة:هناك ناس غاوية نكد في المنتديات ، إيه رأيك تروحي تنكدي عليهم هناك؟ صدقيني حتلاقي اللي يسمع وينبسط ويعلق
ثاني حاجة:أنا من رأيي إنك بثمن العربية تروحي تخطبي واحد لإن كل البنات حتبدأ في هذا المشروع للقضاء علي العنوسة
(والكلام عام)
ثالث حاجة:مفيش حد يعرف يقرا كيب لإن الناس متعرفش غير إنها تقرا كتب (جهلة مش كدة؟)
رابع حاجة:هذا يتوقف علي نوع موضوع الكتاب . وبعدين متضايقة ليه من السينما؟ ماهي ماشاء الله مليانة بالهبل والتخلف واللي مش حيشتري تذكرة مش حيتفرج . ليه بقي نصدع الأنفخي بالعلم والسياسة والاقتصاد والكلام العقد ده (نقلاً عن أحد السوفسطائية)
خامس حاجة:الكورس مستني اللي يروحله
سادس حاجة:إنت مش لاقية حد تحبيه ولا مش لاقية حد يبادلك الحب؟ لو كنت الأولي فده مش ذنبك لإن اللي الإنسان اللي يتحب فعلاً بقي قليل ودايماً بيتحجز لحد من قرايبه، وإذا كنت الثانية فأنا رايي إن اللي مش منتبه ليك ميستحقكيش وأنا رأيي إنك تحبي الخير للناس لحد ما تفرج
سابع حاجة:علموه الجزارة بقي سفاح
_________________________________

الحاجات اللي مش عارفة تعمليها
أول حاجة:الرسم فيه هرب من الواقع الأليم و ليه دور كبير في المعالجة النفسية زي أي فن محترم ومش شرط الرسم يبقي أكاديمي ،جربي الرسم السيريالي
أو حتي اخترعي لنفسك مدرسة جديدة
تاني حاجة:مش المفروض تبطلي تماماً ولكن يكون الهزار خفيف عشان متبقيش تقيلة أو مدلوئة
تالت حاجة:فيه ناس كتيرة كدة بس لازم تبطليها عشان تدي اللي إنت زعلانة منه حق الدفاع عن نفسه
رابع حاجة:القدرة علي الإقناع ضروري للمدرسين و بالنسبة للأراء الشخصية ، اللي مش حيقتنع بيها إما مش فاهم أو مش من نفس نوعك أو من نوعك بس مستكبر يقول إنك صح
خامس حاجة:إنت كده وضحتي النقطة السابقة (العيب فيك) . جربي تتمرني قصاد مراية و خلي بالك مش كل الناس تقدر تعمل كدة
سادس حاجة:إنت عاكسة كلامك من غير قصد ولكن المعني مفهوم (دليل علي عدم وجود نفاق)
سابع حاجة:الاعتراف بالخطأ يخليك تقللي من أخطائك لإن ده بيضعك في صورة سيئة قصاد غيرك ونفسك فيخليك متغلطيش كتير عشان متعترفيش بالخطأ وتقل قيمتك
ثم إن الاعتراف بالخطأ من تهذيب النفس وكسر التكبر وهو من الفضائل المفقودة في مجتمعنا عشان كدة بيقع ويتملي نفاق والنفاق مش بس يكون لغيرك ، ساعات كتيرة بيبقي لنفسك
_________________________________

السبع حاجات اللي بتقوليهم دايماً
والله-ياسلام-يا راجل:أنا كمان بقولهم
بس أنا بسيب اللي يقول يقول وبعبع ويهرتل وينفخ ويبخّ ويفشر (علي رأي مجمع تطوير اللغة الشبشبية برئاسة المطوِِّر العلامة كرنبة المفش) . عشان ما يقولش إني حرمته من حاجة
إيه النظام:حتلاقي الناس تحلوّ وتقوللك (في العظام)
أيه القمر ده:أنا بقول (ياللهول) وهي تحريف للكلمة الأصلية في اللغة (يالهوي)
أما بقي لو شوفت (واحد) حلو بقول(الله يخرب بيوتكوا ... حتقطعوا علينا)
يا رب ارحمني بقى:بقولها لما أي حد يتكلم معايا في أي شيء
خدني و ريحني يا رب:بقولها لنفس الظروف في النقطة السابقة
كلام بسيط منك يا هبة ويعبر عن صفاء النية وصدق مع النفس .. استمري; 5 أكتوبر 2008 في 7:57 م

إرسال تعليق