اثناء تقليبي في محتويات المدونة . وجدت اشياء كثيرة قصص مقالات . رغم انني من كتبها الا انني لم اجد فيها شيئا من نفسي . لذا اكتب هذا الموضوع عن نفسي لانها مدونتي في الاساس ز هذا الموضوع لا يعد عمل ادبي و لا يصنف تحت اي نوع من انواع الادب . هو فقط كلام من القلب
**************************
كلام
جوايا كلام كتير عايزة اقوله .... اقوله و لا مش هقوله .... طب اقوله ليه و عشان ايه .... وهيحصل ايه لو مش هقوله ...اقعد بالساعات افكر اقوله و لا مش هقوله ... فجاة... القى الوقت فات و عدى عليا من غير ما اقوله ...ما هو كتر التفكير ساعات بيكون غلط .... انما قلته هي اكبر غلط
**************************
اخوات
كنا اخوات ... احباب ... شقايق ... ايد واحدة في طبق واحد .... حتى النوم على سرير واحد ... ايه اللي حصل و افترقنا ليه؟ .... واحد شرق وواحد غرب ... وواحد منعرفش عنه حاجة ... ما هي الدنيا دي سوق كبير ... ولازم هييجي يوم فيه راح نفارق ... ولا يمكن نتقابل تاني !
**************************
بحبك
قلتها كتير في الحلم... مش في الحقيقة ... بحبك .. سمعتها كتير ... في الحلم ... في الحقيقة سمعتها مرة ... بس ساعتها اتمنيت اني عمري ما اسمعها ... عشان خرجت من اخر واحد كان ممكن افكر فيه !
**************************
الحب
بحب الحب الهادي البطيء ... بحب الحب لما يمشي على اطراف رجليه ... يخبط باب قلبك بشويش ... وتفتح انت ... من غير ماتعرفه ... ويبدا يتسلل و يسكن قلبك .. تمليك مش ايجار جديد ... ساعتها بس هتعرف انك بتحب و لا يمكن تستغنى عن حبيبك ... وساعتها بس هتعرف معنى التضحية و هتستلذ طعمها !
**************************
النصيب
سلسلة من المصادفات ... مش ممكن تقدر تربط بينها و لا تحس بيها ... بس هي اللي هتتحكم في حياتك ... وتحددلك كل حاجة ... بمزاجك او غصب عنك ... كل اللي عليك انك تعمله ... اعمل اللي عليك ... ولا تقصرش وسيب نفسك لنصيبك ... هو لوحده اللي عارف مصلحتك فين !
**************************
حلم
كان فيه حلم .. حلمته كتير قوي ... الحلم كان فيه واحدة ... وكانت مجنونة و انا كنت دكتورة ...مسكتني من رقبتي و بدات تضغط ... مع الوقت ابتدا وعيي يتسر سب ... كنت بتخنق بجد ... ومت في الحلم ... لما كبرت كان نفسي اطلع دكتورة ... ولما معرفتش ... حمدت ربنا ... يمكن لو كنت دكتورة كان زمان مريض موتني !
مرة حلمت برصاصة ... كانت داخلة صدري ... غريب اني حسيت بيها فعلا ... كانها بتدخل ... ولما صحيت مالقيتش حاجة غريبة ... زي ما نمت زي ما صحيت ... و لا فيه حلم و لا فيه رصاصة
**************************
نفسي
ساعات بحس اني بظلم نفسي ... مبفكرش فيها الا قليل ...جوا دماغي حاجات كتيرة قوي ... شخصيات ... افكار ... صراعات ... لكن نفسي مالهاش نصيب في كل دة ... نفسي اهتم بيها اكتر من كدة شوية ... افكر فيها هي و بس ... مش في بافي الشخصيات الموجودة في خيالي
... وعلى الورق بس !
**************************
زواج
نفسي اتجوز بصراحة ... بس مش عشان كل الاسباب اللي تقولها البنات ... ولا حتى عشان الاسباب بتاعة كتاب عايزة اتجوز ... نفسي اتجوز لاني نفسي احس اني مش لوحدي ... رغم اني عندي اخوات و اصحاب كتير ... لكن شعور الوحدة دة مش قادرة اتغلب عليه .... كمان حاسة اني فيه حاجة كبيرة قوي ناقصاني .. مش عارفة ايه هي ؟ ... رغم اني لو اتجوزت فيه احتمال كبير ان جوازي يفشل .... او تكون حياتي مليانة مشاكل ... بس انا شايفة انه مش مهم ... اعتقد ان الصورة الصح هي راجل و ست واحدة مش ستة ... ربنا خلقنا كدة و خلق كل الكائنات كدة ... اسالوني انا دارسة بيولوجي 5 سنين ...غريبة انه فيه ناس بتقول انها عازة و كدة كويسة ... بس انا مش من الناس دي ... بس اكيد انا مش هتجوز اي واحد و خلاص !
***************************
اكل
بحب استطعم الاكل كويس ... بحب الشيكولاتة ... بحس و انا بكلها ... اني بنت عندها 10 سنين ...بحب الاحساس دة قوي ....الطبيعي ان الناس كلها بتاكل الحادق الاول و بدها تحلي ... انا باكل الحلو الاول و بعدها احدق ... مش عارفة ليه انا بعمل كدة ... بس بحب طعم الملح قوي اكتر من السكر !
***************************
صلاة
قعدت فترة طويلة مش عارفة انتظم في الصلاة ... حاولت بس مقدرتش ... و في مرة كنت عند صاحبتي ... لما الاذان اذن ... راحت تصلي ..و بعدها قالتلي مش بتصلي ليه ؟ ... مرديتش ... بس من ساعتها انتظمت في الصلاة .... كاني كنت مسنية السؤال دة !
***************************
اسكندرية
مش عارفة ان كنت بحبها و لا لأ ... يمكن لو بعدت عنها شوية هشتاقلها ... حتى البحر ... ناس كتيرة بتقولي يا بختك انك عندكوا بحر .. زمان و انا صغيرة ... كنت فاكرة ان الدنيا دي شريط طويل ... شريط على بحر كبير ... لما كبرت شوية ... استغربت ان فيه دول و اماكن كتيرة معندهاش بحر... ساعتها مصدقتش ... و لحد دلوقتي مستغربة ... يعني ايه معندهمش بحر !
***************************
اصحاب
عندي اصحاب كتير قوي ... بس اللي يعرفني منهم بجد ... و اللي يفهمني منهم بجد ... قليلين قوي ... واحدة ... اتنين ... تلاتة ....
بس كتير بيقولولي اني غامضة و ساعات مغرورة ... بزعل لما حد يقولي كدة ... و بقوله يسال صحابي بجد انا مين؟ ... و يا ترى استحق انك تعرفني و لا لأ؟
***************************
انتظار
ليست حياتي سوى مزيج من الترقب السخيف ... والانتظار الممل ... لشيء لا اعلمه ... لشخص لا اعرفه ... لكن كل ما اعرفه ان ما انتظره سوف يغير حياتي كلها ... للافضل احيانا و احيانا للاسوا
رغم اني بكره الانتظار ... بس اكيد بحبه ... و حب الانتظار لشيء واحد ... لانه بيدينا سبب ... سبب واحد للبقاء احياء .... عشان كدة بحب المسلسلات ... عشان انتظر الحلقة الجاية ... ويبقى كدة انا عندي حاجة مستنياها !
***************************
اماكن
بميز الاماكن ... مش باسمها ... و لا بصورتها ... انما بريحتها ... كل مكان عندي ... له ريحة .. اي ريحة ... بس لما بشمها بفتكر لمكان على طول ... حتى الاماكن القديمة بفتكر ريحتها ... زي مدرستي الابتدائية ليها ريحة ... مش فاكرة كانت ريحة ايه جواها ... بس لما بشم الريحة دي بفتكر زكرياتها كلها ... كاني موجودة فيها فعلا !
***************************
قديم
بحب الحاجات القديمة قوي ... كتب قاديمة ورقها اصفر ريحته قديمة ... اغنية قديمة بطيئة ... بتتغنى بروقان ... مش كان حد بيجري ورا المغني ... فيلم قديم ابيض و اسود ... الناس فيه قديمة ...تسريحة الشعر المموجة ... فساتين منفوشة ... و الميني جيب ... و طربوش احمر ...و بدلة سوداء ... بشعر على جنب او فرق من النص ...عندي شوية كتب قديمة و جرايد قديمة على شوية بلوزات راحت موضتهم من التسعينيات و جيبة قصيرة منفوشة من التسعينيات برضه ... شايلاهم في الدولاب و كل شوية بطمن عليهم ... كانهم كنزي
اما الكتب مش بديها لحد خالص اصلها لو ضاعت هزعل عليها قوي !
***************************
سخرية
اي حد بيعرفني يقولي اني لايق عليا اني اكتب ساخر ... يمكن عشان بحب الضحك و الهزار قوي ... بس مش عارفة ليه كل ما امسك القلم ... بحس اني جد قوي و كئيبة قوي ... اكيد كل دة في عقلي الباطن !
***************************
هناك 16 تعليقًا:
عوده قويه بعد اكتر من شهر انقطاع
كلهم حلوين بجد بس عجبنى النصيب و بحبك وحلم بصراحه كلهم احلى من بعض
تحياتى
كل مافي الأمر يا هبة إنت مليانة أفكار مش عارفة توديها فين بالإضافة إلي إن مفيش حد يكلمك ويناقشك في اللي (إنت) مهتمة بيه
بعد الجواز صدقيني حتختلف أحاسيسك ومن ثم كتاباتك
انا مفتونة بيك ياهبة
انت روعة
ياريتني صاحبتك يا هبة
بجد كلماتك صادقة وقوية
و بسيطة عجبتني بتاعة الجواز قوي
ربنا يكرمك يا هبة
تقبلي مروري
لاسع افندي
و لا قوية و لا حاجة دة شوية فضفضة
تحياتي
كريم
وشك كان حلو اخر يوم امتحان
مش كنت تيجي من زمان
هو الحقيقة اني مش من هوات الفضفضة مع حد
كفاية قوي مع الورق
سلام
من اجل عينيك
حبيبتي فطومة
و الله انا بحبك بجد كفاية انتك كنتي من موهوبي دار ليلى اللي عدوني بموهبتهم
طب ما احنا اصحاب
قوليلي ميلك ايه و اعملك اد
انا عملتلك اد على الهوت ميل
بس انتي مضيفتينيش
تحياتي
عمرو وجيه
الف الف شكر لتعليقك الجميل
امين
يارب اشوفك هنا دايما
تحياتي
ابله هبة
والله مبدعة ايه الجمال ده ربنا يحفظك ده أنا هربان من الفيزياء وكنت مخنوق عشان المنتخب لكن هنا فرفشت تاني
ابله ديه عشان حضرتك مشروع مدرسه
اعتقد انه من الافضل ان حضرتك تقفلي تأكيد الكلمات عشان يبقي التعليق عند حضرتك أيسر و أسرع لكن حنعلق برضه حتي لو صعب
احمد بسام
طبعا ابلة بس ابلة دي بتحسسني اني كبيرة و انا لسة صغيرة اصلا
كويس اننا ريحتك من هم الفيزيا و الله اخويا ادك و بتحايل عليه يقرا لكن ما بيقراش
انا مش عارفة ازاي اقفل تاكيد الكلمات لو عرفت هاقفله
تحياتي
عارفة لما تقري حاجة و تفتكري اللي راحو في دروب الزمن
و تفتكري احساس طفولتك
و تفتكري أول يوم ف المدرسة الاعدادية لما اول مادخلتها اتكعبلت و وقعت على وشي
و كلمة بحبك اللي ماقلتهاش غير متأخر اوي
و كلمة بحبك اللي استنيتها من اللي ماقلهاش سنين و لا قالها أصلا
و و و و
هو ده اللي حصلي معاكي
اهه هابطل رغي
ده أنا رغاية صحيح!
اسماء علي
يا بنتي ارغي براحتك
دة بيتك و مطرحك اصلا
بس انا عايزة اعرف
هو اللي حصل معاكي و لا معايا
:)
مدونتك حلوة وخصوصا اخر تدوينة اللى من نفسك..
بس لفت نظرى سطر كتبتية عن السعيد النحس حلوة اوى دى طيب تيجى ازاى سعيد ونحس واذا كان هو نحس لنفسة فهذا عادى جدا ولكن عندما يتحول نحسة الى الجميع يبقا بالتاكيد العيب مش منة هو ههههه ومدام سعيد يبقى بالتاكيد مش وحيد بس ااحنا كدة بندى الامور اكبر من حجمها بدون مبرر
لان كلنا نعد من الكسالى الخامليين
بس الصراحة جميلة الفضفضة
هلوسات
متشكرة جدا على تعليقك
بس انا مش عارفة انت قريت الجملة دي فين
:)
انا تقريبا نسيت اللي كتبته
تحياتي
اولا" انا عايزة اقولك انى دخلت وعملت يوزر مخصوص هنا عشان ارد على الكلام والفكرة والاسلوب الجامد دة
انا عارفه انى اتاخرت فى الرد بس حقيقى انا لسه شايفاها النهاردة بس
وبصراحه شدنى جدا انى اقراها للاخر وحسيت بجد ان ظنى فيكى كان فى محله
ربنا يوفقك يا هبه والامام دايما يا قمر...
امولة
تاني مرة هقولك نورتي بجد
ايوة كدة لازم تعملي يوزر عشاني طبعا
بجد بجد
الف و مليون شكر على كلامك
انا طبعا عارفاه
:)
ربنا يخليكي ليا يا حبيبتي
:*
إرسال تعليق