بفكر بقالي كتير اكتب بوست زي دة
بس اتشجعت دلوقتي و قلت اكتبه لما لقيت من المهم هات من الآخر كاتباة زيه
قلت اتشجعي يا بت يا بووووو و اكتبيه
طبعا انا هقعد عالشيزلونج زي الافلام
..............................
رغن اني زي كل الناس بحب اتكلم عن نفسي كتير بس لحد دلوقتي مش بعرف اقدم نفسي بشكل كويس
من غير ما اكسف رغم اني اجتماعية قوي
ناس كتير بتشتغرب اني بتعرف عالناس بسرعة و بتصاحب بسرعة
بس اللي الناس متعرفوش ان معنديش اصحاب كتير
و ان اغلب اللي اعرفهم بيني و بينهم سدود انا اللي بحطها
............................
بحب المغنيين القدام
حليم فريد شادية صباح وردة
عبد المطلب .. مش دايما يعني
بسمع وردة كتير قوي و انا قاعدة عالنت
اغنية واحدة كل يوم
ليالينا ليالينا
بسمعها دلوقتي :)
راحت فين الناس الحلوة
ياترى الدنيا غدارة فعلا زي ما بتقول وردة ؟؟؟!!!!!!!
مش عارفة بجد
بحب كمان اغنية حلوين من يومنا
لسيد مكاوي
بترجعني للتسعينيات و لايام طفولتي
..........................
انا بتعلق بالناس بسرعة و اي حد عرفته مش بنساه بجد
بتضايق قوي لما ناس كنت عارفاهم و مبقتش اشوفهم و يوحشوني
طب اعمل ايه لو مش قادرة الاقيهم حتى
ببقى متضايقة جدا
مش عارفة اعمل ايه بجد
بحس بالحنين كتير قوي ليهم
و لاماكن روحتها و لاشياء ضاعت مني
حتى حاجاتي بتعلق بيها
ساعة موبايل هدوم
اوضتي مليانة كراكيب في الادراج و شنط في الدولاب كلها صور و قصاقيص و حاجات قديمة
كل الحاجات دي مقدرش اتخلى عنها
..........................
بحب البساطة قوي و اكره التعقيد
اصل الدنيا اصلا مش ناقصة تعقيد
يبقى ليه فيه ناس بتحب تعقد الامور ؟
ليه متبقاش كل حاجة بسيطة
ساعتها هتبقى الحياة سهلة قوي
و محدش هيشتكي
بس اقول ايه
مفيش فايدة
.......................
لحد وقت قريب كنت متضايقة اني بنت
طبعا لاني وسط اخين و على طول بقول اشمعنى
لكن من قريب حسيت اني كدة احسن
يعني مثلا اوقات لما يبقى فيه طابور زحمة او مواصلة زحمة
في اي مكان
تخيلوا بقى فيه ناس بيقوملي عشان اقعد
و ناس بتعديني في الطابور
مكنتش مصدقة بجد
كل دة بابتسامة شكر
وقتها اقتنعت ان انا كدة احسن
رغم اني دلوقتي محدش بيقوم و يقعدني
و لا حد بيعديني في الطابور
بس برضه كدة احسن
....................
اصحاب كتير غدروا بيا مش عارفة ليه؟
تقريبا شكلي فيه شيء يوحي بالعبط
و رغم كدة انا عمري ما اقول لحد لأ ابدا على مساعدة او خدمة
ساعات انا اللي بعرض عليهم الخدمة
دة اللي بيخليني في اوقات كتيرة ابقى شايلة مسؤلية اللي حواليا
دة برضه اللي بيخليني اشتاق لحد يشيل مسؤليتي
انا كمان . ما هو انا مش هفضل طول عمري كدة !!!!!!!!
....................
بحب اماكن كتيرة قوي ماتتعدش
في اسكندرية و اي مكان تاني بروحه
بس للاسف لما بروح الاماكن دي تاني بحس بالغربة
يمكن لاني حبيتها في ظروف تانية و مع ناس تانية
دة اللي بيخليني محاولش اروحها تاني
لانها الاحسن تبقى زكرى جميلة جوايا!!!!!!!!
....................
رغم اني بقول لاي حد اوعى تندم يوم
الا اني انا بندم على طول
بندم على حاجات عملتها
على كلمة قولتها
على حاجات معملتهاش
...................
بحب اكتب قصص عشان افضي دماغي
اصل انا دماغي بحس انها مليانة احداث و شخصيات
اول ما اكتبها عالورق بتتمسح خالص من دماغي
حاجة بتريحني كتير قوي
...................
انا مش بحب التسوق خالص
و ببقى متضايقة جدا لما بنزل اشتري حاجة
و دايما اشتري حاجات مش عاجباني لمجرد اني اشتري و اخلص
...................
انا بكره الجبنة جداااااااااااااااااا بكل انواعها طول حياتي و بحب الزبادي
و بشرب اللبن و ساعات كاكاو
انا لا اطيق ريحة البن و النسكافيه و كل مشتقاته
و اعشق الشاي بدرجة تخوف
و بحب اشربه كشري
انا مش بحب اكلات كتيرة جدا
و بكره الاكل كله في الصيف
..................
بحس دايما ان بعض الشيوخ في الفضائيات منافقين
بيبان عليهم دة و بحس بكدة كتير
رغم ان اغلب الناس بتحبهم و بيستنكروا كلامي دة
..................
رغم اني عندي 21 سنة و حتت
الا اني حاسة ان مشاعري لسة طفوليه
مع اني بفهم الناس بسرعة و بكشفهم كانهم متعريين قدامي
طبعا دة حصلي بعد بلاوي كتيرة من ناس كتير
مش بالساهل كدة
.................
كتير بيقولولي ان قلبي اسود عشان مش بنسى حاجة وحشة حصلتلي
و مش بسامح بسهولة
و كفاية كدة
الشيزلونج مش مريح للدرجة دي
:)
هناك 25 تعليقًا:
ضحكتيني اكتر من مرة .. حلوة التلقائية دي خالص ..تلقائي اوي البوست ده ،
ايوة على يدى كرهك لسندويتشات الجبنه
وتشهد عليها مدرستنا القديمه
بس عجبنى انا كمان البساطه والتلقائيه دى وحسيتك بجد قاعدة عالشازلونج وبتخرجى الى جواكى
ما تنزاحى شويه كدة خدينى جمبك
ولا انتى استحلتيها
بس بجد بجد الله ينور يا بيبو بوست جامد واكيد مريييييييييح جدا
ولا ايه؟؟؟
حاسس انك على الشيزلونج فعلا :)
كتري من الخواطر الجامدة دي :)
هههههههههه
حد يروح الشيزلونج برجليه
تحياتى اللاسعه
تحقة يا هبه و كتير حسيت اني انا اللي بكتب رغم اني بموووووووووووت في الجبنه وبكره الشاي
بس اسلوبك قريب قوي من القلب
كل سنة وانتي بالف خير ورمضان كريم
محمود
نورت المدونة
امممممممم
ضحكت عليا ليه؟
:)
تحياتي
امولة
اخيرا يا بنتي عبرتيني
سلامات ليكي وحشاني و الله
هههههههههههه
كنتي بتضحكي عليا و تاخدي سندوتشات البيض بالبسطرمة
و ماتدينيش حاجة
ايام ما تتعوضش و الله
خلاص دة انتي خطوتين و تبقى عندي
و اقعدي براحتك يا ستي
مريح طبعا يا باشا
وزير
ازيك؟
اخيرا علقت عندي
حاضر من عينيا
سلام
لاسع
تخيل روحت برجليا و بمزاجي كمان
تحياتي ليك
شروق نورتيني
اول مرة تعلقي زي اغلب الناس اللي معلقين عالبوست دة
اممممممممممم
بقى بتحبي الجبنة
و بتكرهي الشاي
و انتي طيبة يا حبيبتي
بساطة مع تلقائية وقلب مفتوح عالبحري
واضح إنك اجتماهية جداً يا هبة
مشفتش جملة واحدة في المقال فيها تصنع أو محاولة ضبط مشاعر .. فعلاً عالشيزلونج
كريم
اتاخرت كدة ليه ؟
واضح
نهار ابيض
هو انت يا ابني متعرفنيش شكلك
اه بعد كام سنة في بيولوجي
ربنا يسامحك
ربنا معاك السنة الجاية و تعدي على خير
تحياتي
انتى
طيبه اوى
وجميله اوى
وصريحه اوى
ورقيقه اوى
وتلقائيه اوى
شفتى انتى ايه؟؟؟؟؟؟؟
روني
بجد بجد
انا مكسوفة قوي من كلامك
و يارب يارب ابقى حتى ربعه كمان
ياريت تنوريني على طول
تحياتي
:)
علي فكرة يا هبة مش كل اللي ليه صحاب كتير يبقي اجتماعي جداً
أنا مثلاً عندي أصحاب كتير لكني أميل للانطوائية أكتر ... بالرغم من إنك تلاحظي تناقض الانطوائية مع طريقتي في الكلام مع الناس .. لكن ده نوع من إعانة ربنا في الرزق لإن مينفعش يكون فيه مدرس معندوش القدرة علي الكلام مع ده وده بدون خجل
فهمتي ليه بقي أنا قلت إنك اجتماعية؟
فيه إعلامات بعتهالك في رسالة فورية عالإيميل
أنا انبسطت أنك ذكرت أن خاطر الشيزلونج أتي من مدونة هات من الاخر
فعلا اجتماعية انا يا كريم
و برضه انت اجتماعي
على فكرة
انا ادرى اسمع كلامي
:)
منتظرة الموسيقى
سلامات
مرام
نورتيني
دي اول زيارة ليكي هنا صح؟
انا فعلا البوست بتاع انجي هو اللي ا
داني الخاطر دة
و دي الحقيقة
تحياتي
أنا كده بعتلك اللينكات في كل مكان تقريباً
http://www.mediafire.com/download.php?dzhmi2mmooy
http://www.mediafire.com/download.php?zjczzyevnj4
هبه خميس
ولا ميس و لا ابله اهو
بوست صريح ورائع
كل رمضان و حضرتك بخير
جزيت خيرا
متشكرة يا كريم
انا نزلتهم
سلامات
احمد بسام
ايوة كدة هبة بس
و انت طيب يا احمد
:)
السلام عليكم
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه
وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم
وارزقنا العفاف والرضا - والمحبة واهدينا يا عظيم
وأعنا علي القيام والصيام والصلاة والارتقاءالي جنة الفردوس
واجعلها لنا ميراث خير وسعادة
واجعلنا من عتقاءك في هذا الشهر يا معطي يا وهاب
وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله
عايز أقول اننا في أيام مباركة ويجب استثمارها في الخير والتقرب من الله
حسونة
كل سنة وحضرتك بالف خير
و ربنا يعيده عليك بالصحة و السلامة
تحياتي
جميلة أوي تلقائيتك يا هبة ... حسيت ان انا اللي قاعدة ع الشيزلونج بالرغم من ان في اختلافات بنا ... اتكلمتي كتير عن حاجات كتيرة اوي كأنك في فضفضة مع نفسك ... و ع فكرة بالرغم من بساطة اللي قلتيه الا انه بيحمل في طياته تهكم و سخرية من أوضاع كتيرة في مجتمعنا ... زي التفرقة بين البنت و الولد ... و حال الشيوخ و الدعاة الإسلاميين في مجتمعنا ... يا ريت تنشري حاجتك الحلوة دي في الأكاديمية ...
إرسال تعليق