ترقص؟

أنا مبسوطة

جميل جداً إن الواحد يكون مبسوط في ظروف متسمحش بأي انبساط خالص يعني ، بس أنا مبسوطة فعلا انهاردة و نفسي اتكلم عن انبساطي زي ما بتكلم عن اكتئابي ، يمكن عشان لما ارجع للبوست دة انبسط تاني و تالت و رابع و مليون .

انهاردة كانت خطوبة ياسمينة و عكس كل المناسبات الاجتماعية اللي بحاول اتهرب منها انا روحت يمكن عشان بعزها قوي و حقيقي كنت عايزة اكون معاها فعلا و يمكن كنت مطمنة اني مش هتجيلي اعراض المناسبات الاجتماعية زي الهرش و التوهان و الانزواء

عشان كان معايا سمية -سمسمة- اللي انا بحبها جدا و نفسي اني اعرف اي حد في نص برائتها و طيبتها ، أصل الصحاب دول نعمة من عند ربنا و أكبر نعمة كمان .

انهاردة و لأول مرة اعملها وسط ناس -سيدات طبعا- رقصت ،أيوة الله رقصت و مش على أغاني قديمة او مزيكا راقية شوية ،لأ رقصت على أغاني شعبية ، وقتها افتكرت منير و هو بيقولي ترقص غصب عني ارقص ، يمكن وقتها حسيت انه معاه حق و اننا بنرقص اوقات غصب عننا المهم ايه اللي جاب منير للشعبي اهو كله رقص.

:)))))

يمكن لو حد اتصرف قدامي التصرف دة في وقت تاني كان ممكن اتخرم من نظرات الاحتقار اللي هوجهاله ، انما انهاردة كان غريب اني اتصرف زي باقي البنات و آخد عالجو بسرعة و اتعرف على قريبات ياسمينة البنانيت الحلوين اللي اتصاحبت عليهم من اول ما عرفتهم و اللي طبعا اتصورت معاهم مليون صورة من غير العروسة :))

طبعا انا كنت قايمة بدور المصورة الرهيبة هبة يعني بالطول و بالعرض و شغالة و مبطلتش هزار مع البنانيت 

تاني تصرف عملته 

محدش يضحك عليا 

مش قادرة ابطل ضحك لحد دلوقتي

المهم مطولش عليكوا 

قررنا نعمل حركة معملناهاش قبل كدة ،سمية جهزت معاها كيس في شنطتها و لفينا الجاتوو في كلينيكس و اديها جوه الكيسة احنا و البنات كنا متواطئين في التصرف دة الل كان في البلكونة الحمد لله .

طبعا كنا هنقع م البلكونة من كتر الضحك بس انا كنت مستمتعة جداً.

كان نفسي اقرص ياسمينة من ركبتها بس معرفتش للاسف كانت مرسة عليها جامد بس على مين هتنقرص يعني هتنقرص

:@

و انا مروحة انا و سمية مشينا على شريط القطر و القطر كان ورانا كنا بنجري و بنضحك في نفس الوقت لحد ما الحمد لله لقينا سلم نزلنا عليه درجتين عشان القطر معدي .

و عديت كمان على بيت نوسة حاجة وحشة قوي انه الاصحاب يسافروا و انه لما نعدي على بيتهم نحس بفراغ و بان مبقاش فيه حد موجود هنا تاني . عادي لمسة شجن واحدة في اليوم الحمد لله انها كانت واحدة .

و لما وصلنا قرب بيتها اتخانقتلها مع ست رخمة كدة عشان اركبها المشروع قعدت اتخانق مع الست و ازاي تحجز و ازاي و ازاي ووسعت مكان و بعد كل دة الست اتفاجئت باني مش هركب و بركب صاحبتي ، الله انبسطت قوي و انا بتخانق و بدافع عن حق صاحبتي في انها تلاقي مكان في المشروع ،اصل انا لو سكت مكنتش عرفت تركب .

و انا بكمل الطريق لوحدي جبت شيبسي بطعم الفطار للاسف طلع طعمه سلطة بابا غنوج-يع- اللي انا مبحبهاش بس لما اكلت منه اكتشفت ان طعمها حلو فعلا ، ازاي انا مجربتش اكلها لحد دلوقتي و بدعي اني مبحبهاش هو ينفع اكره حاجة معرفهاش؟

بس كدة خلص اليوم اللي انا كنت مبسوطة فيه بس مش معنى ان اليوم خلص ان الانبساط راح .. يارب ابسطتني كمان و كمان .

:))