ما أنا قلتلك قبل كدة ان البنات نوعين :
نوع تحبه و مش لازم يحبك ، و نوع يحبك و تصاحبه ، يكونلك مجرد أخت أو صاحبة .
و قلتلك ببساطة اني من النوع التاني و رغم اني بحبك أنا ممكن اكونلك أخت ،أنا مكنتش زعلانة .
ساعتها ضحكت عليا و فضلت رامي ابتسامة تكذيب منك لكلامي .
قلتلي ببساطة انك بتحبني بس مش زي أختك و لا صاحبتك .قلتلي اني حبيبتك .
******
تعليقاتك المستفزة على كل تفاصيلي :ضحكتي،صوتي ،لبسي ،جسمي ،حتى تفكيري .
نظراتك لكل بنت معدية و مقارنتك دايماً بيننا ،كانت بتموتني .
مرضيتش اقولك اني من يوم ماعرفتك بقيت صفر .
أنا بقيت آآآآآخر واحدة ممكن عينك تلقطها أو تشيعها باعجابك اللي يقدر يغرق الكون كله .
******
انا مكنتش عايزة أكتر من ان عينك تشوفني ،تحضن ملامحي ،و تلمسني .
لمسة دفا واحدة ،صدقني مكنتش هتفرق معاك لكن كانت هتبقالي كون بحاله ،كنت عايزة اسمع صوتك لما الدنيا تهدى و ترجعني وحيدة .
كنت نفسي أكون زي ما انا عالأقل .
بس حتى و انا معاك كنت بردانة و قبلك كنت بردانة ،يبقى وجودك فرق ايه معايا؟!!
*****
لأنك شاعر فحبستني جوه قصيدتك .كنت مجرد حالة و راحت لحالها .
و لأن قصايدك كتيرة و نفسك تخبي جواها وجع اكتر و تسيب بعدها نزف طويل .
خلصت حكايتنا بسرعة .
*****
كان غريب اني اكون لسة محتفظة برسايلك و ايميلاتك و اعيد قرايتهم كل مدة او دقايق ، صدقني استغربت لما فهمتك ،
لأنك مجرب كان لازم اصدق احساسك وقتها و اني اتوه عنك وسط الرسايل .
يمكن لان وقتها عيني مكنتش شايفة الا كلامك ،انما حقيقتك ،انت .
بيقولوا ان عيوننا مش بتشوف الا اللي بنقولها تشوفه ،
تفتكر عشان كدة أنا مشفتكش ؟؟
بس عارف في نهاية اليوم بعد القراية أنا عملت ايه؟؟
بضغطة مني على Delete
مسحت كل تفاصيلك و حكايتك .
*******
طقوس وحدتي بعدك مكنتش بنفس الطعم قبلك ،
صدقني بقيت بستمتع بيها اكتر .
هناك تعليق واحد:
ظبتى حياتك من غيره ، ميستاهلكيش
إرسال تعليق