بستغرب من اي حد بيسأل دايماً ازيك؟ ،عاملة ايه؟ يقوم ينتظر مني الرد التقليدي
"الحمد لله ،انا كويسة "
ليه كويسة ؟
مع اني معظم الوقت ببقى مش كويسة
فانا لو سألت نفسي دلوقتي نفس السؤال
"ازيك يا نفسي ؟،عاملة ايه؟"
هقوم ارد عليها و اقولها
"الحمد لله،انا مش كويسة "
أنا فعلا مش كويسة ،مش عشان صحيت الصبح بدري درجة حرارتي 40 و مش شايفة قدامي ،
و مش عشان انا مثلا لقيت نفسي مضغوطة في الشغل لا سمح الله و مطلوب مني اخلص مليون حاجة و العيد بكرة
و كمان مش عشان انا بيجيلي اكتئاب الأعياد الموسمي و العيد بكرة فطبيعي مكونش كويسة .
و كمان مش عشان انا اتعشمت و نزلت امبارح عشان احضر عرض الليلة الكبيرة و مشيت قبل ما العرض يبدأ و اللي اكتشفت اصلا انه كان عرض استعراضي مش عرايس .
انا مش كويسة عشان لتاني مرة في حياتي بقع
كنت كويسة جدا لحد ما قررت اني اقوم اعمل شاي زي اي حاجة عادية بتحصلي خلال اليوم من بعد الفطار .
لقيت نفسي فجأة بقع ،كل حاجة كانت بتلف زي اول مرة وقعت فيها بالظبط .
بس انا موقعتش المرة دي عشتان كنت بتدلع او كنت طول اليوم في محاضرات و مأخدتش بالي اني مأكلتش حاجة طول اليوم فكان طبيعي اني أقع في آخر اليوم .
انا وقعت عشان قلبي وجعني ،كانه كان بيتعصر جوه صدري فجأة
أنا وقعت عشان لأول مرة أحس اني ضعيفة قوي كدة و ان معظم التخاريف اللي خرفتها طول اليوم كنت فيها خايفة طول الوقت .
معرفش ليه بقيت خوافة قوي كدة من الناس ،طول الوقت حاسة انهم أقوى و مني و انه سهل جدا انه حد ياخدني جوه كفه و يفتتني .
الغريب اني معظم الوقت كنت دايما بحارب دايما بصراع و بتحدى ،دايما بحس اني اقوى من كل الناس و ان كل ما هواجه الدنيا و الناس اكتر كل ما هكون اقوى و أصلب .
بس انا اكتشفت اني طول الوقت مكنتش قادرة آخد نفسي و لا أتفرج على نفسي من برة و لو لثانية واحدة .
طول الوقت كنت برشق في حواجز حواليا و اتأكد انها صلبة قوي و ان محدش ابدا هيقدر يقربلها .
بس اكتشفت بعد ما رشقتها اني رشقتها من ضعفي مش من قوتي !
انا الحمد لله مش كويسة
عشان اكتشفت من عبطي اني متشعلقة في حاجات مش ليا
و اني كنت بقنع نفسي طول الوقت اني راضية عن نفسي مع اني مكنتش كدة عمري .
انا الحمد لله مش كويسة
عشان لما ربنا طبطب عليا و اداني حاجات اتمنيتها مفرحتش و فضلت اقوله يارب ليا حاجات تانية عندك عاوزاها ،يارب اديهالي حتى لو كانت هتضرني .
انا الحمد لله مش كويسة
عشان قدرت اصوم عن مسببات الحياة زي الأكل و الشرب و مقدرتش اصوم عن تعذيب نفسي كل يوم و عن الشعور الفظيع بالوحدة من بعد الساعة 12 .
انا الحمد لله مش كويسة
عشان عمري ما كنت قوية و عشان كنت بصدق كل كلمة بتتقال و الحمد لله استسلمت لكوني ضعيفة و دلوقتي مبقتش بصدق اي كلام و لا بثق في اي حد .
انا الحمد لله مش كويسة
عشان لحد دلوقتي مش قادرة اعيش كانسانة طبيعية جدا ،اوقات بتفرح و اوقات بتحزن .
انا مش هقدر اكون كويسة الا اما اتخلى عن قرايتي لصلاح عبد الصبور و اسمع الاطلال و اغني "انت منذ الآن غيرك "لمحمود درويش و اعيط .
مش هقدر اكون كويسة الا لما اصحى يوم مش فاكرة خالص اني ظلمت نفسي و دخلتها في قصص فاشلة عشان بس يبقى عندها حكايات تخصها .
انا مش هقدر اكون كويسة الا لما اكون زي البنت اللي في الصورة و البس باليرينا و ارقص و اتنقل في حياتي بين الضلمة و النور ،الحزن و الفرحة .
و من هنا لحد ما اكون زيها افتكر ان الرد المنطقي ل"ازيك عاملة ايه؟" هيكون
"الحمد لله أنا مش كويسة "
هناك 4 تعليقات:
كفاية إن عندك قلبك، نقي، بريء، جميل، زي الباليرينا خفيف، مش ضعيف بالعكس قوته في رقته، إنه هش زي غزل البنات، لو رميتيه يطير لفوق مش ينزل لتحت و كأنه حتة حجر، صدقيني كل ده هو اللي بيعمل منك هبة و من غيره مش حتكوني أنتي و زي ما بيقولو
"What doesn't kill me makes me stronger"
:)
بكرة تبقي كويسة في العيد :)
كل سنة و انتي طيبة يا هبة يا حبيبتي ..
و ينعاد عليكي بالخير و الصحة و العافية يا رب .
جيلان
بجد بشكرك كتير يا جيلان على تعبيرلاتك الرقيقة و اللي اتمنى اني استحقها فعلا
يمكن تكون الجملة دي مبدأي فعلا
بس اوقات كتيرة قوي بنحس اننا ضعفا جدا ،اضعف من اي حاجة
زي علب الكاسات اللي كنت بحب اتفرج عليها زمان
مكتوب عليها
"قابل للكسر"
بس الحمد لله على كل حال السخونية بتروح و هبتدي اروق شوية
شكرا لمرورك الكريم
:)
شيماء علي
ميرسي يا شيمو على تعليقك و على مرورك و احساسك الجميل
هحاول اكون كويسة فعلا
:)
تحياتي
إرسال تعليق