تماشياً مع حالة الرضا و الثقة اللي بمر بيها بقالي فترة-اللهم ديمها نعمة :))- انا قررت أتكلم عن الجبنة ،خاصة و اني اكتشفت اني مش الانسانة الوحيدة في الكوكب دة اللي بتكره الجبنة .
انا بكره الجبنة و دي تقريباً الحقيقة الوحيدة الكاملة اللي اعرفها في نفسي .
مش فاكرة دة بدأ من إمتى بالظبط ،ماما بتقولي انه من اول ما بقى عمري سنة مبقتش باكلها،و من ساعتها و هي بتحاول و مفيش فايدة .
طبعا بالنسبة لأم مصرية جداً زي أمي كانت دي كارثة و أزمة كبيرة ،لأني بعد كام سنة دخلت المدرسة و بدأت المعضلة "أعملها سندوتشات إيه بس؟".
ومن هنا بدأ الإبتكار عندها .من سندوتشات البيض بالبطاطس للقشدة بالحلاوة بالمربي و البيض المسلوق و مقلي في نفس ذات الوقت ،طبعا الاهتمام الزايد عن حده بالبيض دة مش لجماله بس علشان هي عندها قناعة ان انا اكيد عندي نقص كالسيوم و كل العناصر المهمة في الدنيا لأني مش باكل جبنة .
بالنسبة لمحاولاتي نفسها لتذوق الجبنة كلها فشلت طبعاً ببراعة .
افتكر انه كان بابا بيستخدم معايا نظام الرشوة اللي غالباً فشل برضك .
كل اللي افتكره عن طعم الجبنة انها بتلزق و مستفزة كل ما كنت بحاول اجربها كان لازم يعقبه دة محاولة مستميتة لازالة آثارها الرخوة من سناني .بدأت بالجبنة المطبوخة و انتهيت بالجبنة التركي و ما بين كل الاصناف دي فيه اللي جربته كدة كتذوق بس و فيه اللي مقدرتش المسها من ريحتها بس .
يمكن الكره استمر معايا لفوبيا الجبنة ،دة يتضمن لمسها و التعامل معاها لدرجة ان اخواتي لما كانوا نفسهم ياخدوا مني حاجة كانوا بيحطوا عليها جبنة .:((
كانسانة بتكره الجبنة الناس كانت بتتعامل معايا على إني مخلوق غريب ،كل ما كان حد من القرايب بيعرفوا او المعارف كانوا فجأة يقولوا لماما و يحلفوا انه كان عندهم قريب او معرفة كدة بس خفوا تقريبا كانه مرض او حالة نادرة .
يمكن اغرب حاجة اني ابن عمتي الصغير "عبد الله" -اللي انا مربياه و اللي يا ما ضغطت على نفسي علشان المس الجبنة و أكلهاله - من كام شهر بطل ياكل جبنة زيي :D و كرهها بشكل غريب زيي برضك :D .
طبعا انا متوقعة مستقبله بالظبط ،بس ان شاء الله هيتخطى المسألة زي ما انا تخطيت الاستغراب و الدهشة و عدم التصديق و هيبقى انسان طبيعي جدا كل الناس اللي عارفة انه مش بيحب الجبنة هيعملوا نفسهم ناسيين و يعزموا عليه و لما يقولهم تاني هيندهشوا نفس الاندهاش الاول و المدهش جدا في الموضوع انه هيتقبله بابتسامات كتيرة و الحاجة اللي ضايقته زمان لما يكبر هتضحكه .
طبعا انا دلوقتي باكل البيتزا و كل الاصناف اللي بالجبنة الموتزاريللا لانه اللي اخترعها عبقري جدا لانها باختصار مالهاش اي طعم و دة شيء مشجع جدا بالنسبة لي .و دة بقى خلاني لما حد يستغرب و يقولي كل انواع الجبنة ارد عليه بثقة :
"إطلاقاً ليه هو أنا غير طبيعية لا سمح الله ?"
:D
و من دلوقتي بقول
Dear cheese
مهما كان شكلك حلو و مغري و منتشر في الدنيا كلها ،حقيقي
I hate you.
هناك تعليقان (2):
أنا عمري ما سمعت عن معاداة الجبنة دي يا هبة.الجبنة دي بالنسبة لي من أفضل الأكلات.إنها تقف علي الحدود بين الرقة النباتية و التوحش الحيواني مما يجعلها ذات موقف قوي و حيادي.فهي مجمعة الفريقين و موحدة القطرين و قادرة علي لم شمل الجميع علي مائدة الطعام المستديرة.و لكن هناك جانب سايكولوجي أنثروبولوجي من الجبنة.فهي ترمز إلي طمع الإنسان و سعيه للمزيد من وسائل لإشباع الرغبات بواسطة تخليق أعداد مئوية من أنواع الجبنة عبر آلاف السنين.أما علي الجانب السوسيولوجي و الاقتصادي، فتعد الجبنة في مصر أحد معايير تحديد مستوي انتشار الرفاهية في مصر.و ذلك بإحصاء طلبة المدارس من حملة سندوتشات الجبنة البيضاء و مقارنتهم مع حملة سندوتشات الجبنة التركي و سندوتشات الجبنة الحمراء.
الجبنة هي إحدي ركائز اقتصاد العالم بجانب البترول و الغاز الطبيعي و لكن لم عرف عنها من تهذيب و صمت وتنزه عن الرفائع.فإنها لا تحبذ أن تكون سبباً في نشوء النزاعات بين بني البشر.فهي كما قلنا سفيرة للنوايا الحسنة ورسالة للسلام في العالم فلم تنشأ بسببها حروباً مثلما حدث مع البترول و الأفيون و الذهب.
أنا عكسك خالص يا هبة.أنا مش بطيق اللحوم،الحمراء منها و البيضاء.في أكثر من مناسبة أشعر بالغثيان عندما أري إنساناً محسوباً علي نوعي الحيوي و هو يغرس أنيابه في هبرة لحمة أو يقوم بتفسيخ دجاجة.
و أري أن اللحمة تشير إلي البقايا النفسية الموجودة لدي الإنسان من عصور الغيلان.و هي بهذا تقف بجوار ألعاب مثل المصارعة و كرة القدم.و هذه الأشياء ليست موجودة في السلالة المتطورة من البشر حيث استطاع أن الإنسان الجديد أن يتخلص من أشكال الهمجية هذه و ينبذها تماماً.
وأخبراً يا هبة أحب أوصلك رسالة من طبق الجبنة اللي شايله للعشاء.إنها زي ما بتكرهيها هي بتحبك كمان و كمان.و مستنية بلا يأس اليوم اللي تقابلك فيه علي السفرة.
على فكرة يا هبة أنا زيك بالظبط بكرهها بس زيادة على كدة كنت بكره البيض والمربى والقشطة فكانت سندوتشات مدرستي لنشون وبسطرمة وفراخ بانية ;) بس غير كل الأطفال اللي في الدنيا كنت بموت في اللبن وبشربه كوباية طويلة مليانة كل يوم الصبح وساعات بالليل كمان، مزاج يعني :)
تدوينة لذيذة جدا وأعجبتني
إرسال تعليق